我叫偉華，係一個復元人士 ，我係生長於一個單親家庭， 母親在我小時候，已經離家出走，由父親照顧成長。可能由於母親唔在身邊， 自小就養成懦弱自卑冇自信的性格， 就算有甚麼不懂，都不會主動向同學查問，就算長大後同樣唔會主動問同事，後來我因為工作壓力下，舊病復發，被同事送去醫院接受治療。

病發入院

當其時外父曾經問過我太太， 阿華而家咁嘅情況，佢會有乜嘢打算？但係佢好斬釘截鐵咁話，無論點樣，佢都會履行我們結婚嘅承諾，會同我一生一世，渡過呢個難關。咁令我好感動，但好可惜我喺思緒混亂之下傷害咗佢嘅心，最終令呢段婚姻無疾而終。

另外我爸爸喺2005年，因為意外，而冇咗一隻腳，要用義肢，但佢都依然堅持每一個禮拜日，一拐一拐嚟探我，我相信你哋都知道瑪嘉烈醫院有一條斜路㗎啦，而佢咁辛苦都堅持嚟探我，呢樣令我真係好感動。

住院經歷

我記得我首次病發係入東區醫院精神科，相距而家已差不多三十幾年，嗰時 我覺得自己無希望，所以曾經嘗試用饅頭鯁死自己，但好彩畀護士救返。出院後，經一個親戚介紹之下，去咗睇專科精神科醫生，而佢每個禮拜都要收二千幾蚊嘅藥費，當其時嘅藥費全部係我爸爸一力承擔，所以我覺得佢真係好偉大。而講緊嘅係廿幾三十年前，對於我哋嚟講，藥費係一個好昂貴嘅費用，最後我哋要求嗰個醫生寫信轉介我哋去公立醫院治療。 

而我印象最深刻嘅住院經歷，就係十幾年前喺南葵涌醫院。喺嗰段日子，我曾經被注射過一啲強力嘅鎮靜劑，而係會令我腦部受損，同畀佢哋用約束衣綑綁過，呢啲都係一啲唔好嘅經歷。後來我亦都因為行為良好，被啲男護士叫我去做leader管嗰啲住院病人，經過一個月嘅治療，主診醫生認為我病情已穩定，冇乜特別就放我走。

人生如一場足球賽 

出院後，我唔相信其他人，同家人嘅關係變差，經常自怨自艾，自暴自棄，整天都在睡覺。全靠家人同前妻嘅諒解，扶持，鼓勵同不離不棄，令我重新振作。尤其係我過咗身嘅爸爸，佢主動放棄最喜歡嘅工作來全心全意照顧我。使我明白到，人生就好像一場球賽，我承認上半場我係輸咗，但下半場結果係點？就要睇我如何部署，如何策劃 ，我相信只要我努力，就一定會扭轉形勢，取得最後勝利。

後來我去搵嘢做，亦都被人歧視。見工時人事部問我之前一個月去咗邊？我話返咗鄉下。佢又問我可唔可以聯絡我嘅前僱主？我話可以，但我相信我嘅前僱主都可能會話我精神有問題 。所以就算我每次有機會見工，都係石沉大海。 而導致我後來要由管理層轉去做一啲基層嘅保安工作。

復元與優勢為本

其後我認識安泰軒，我嘗試積極參加活動 亦使我對往後嘅人生改觀，我協助中心參予各類嘅主持工作，更使我增強自信。喺上年我更成為咗WRAP嘅帶領員。而家我亦係一個實習朋輩導師，康和嘅求生員義工嘅一份子。亦都擔任好多唔同嘅NGO嘅義工工作。呢啲經歷使我明白到，雖然我係一個復元人士，我亦可以貢獻呢個社會，回饋大眾，幫助其他人。我亦了解到自身優勢，我係有決心，堅忍和唔怕失敗。我更明白到，只是唔放棄就有希望。 

今日我希望藉住我嘅故事，鼓勵同路人唔好輕言放棄，要勇敢面對人生，以生命影響生命，有事同信任嘅人溝通，一定可以活得更精彩及有一個美好嘅將來。

復元故事提供︰偉華@康和互助社聯會

插畫提供︰Vivien Siu